Дональд Трамп 20 наурызда АҚШ Білім министрлігін тарату туралы жарлыққа қол қойған болатын. Бұл шешім министрлік 45 жылдан астам уақыт қызмет еткеннен кейін қабылданып отыр.
2025 жылғы 23 мамырда Массачусетс штатының федералды округтік соты АҚШ президенті Дональд Трамптың Білім министрлігін тарату туралы жарлығын бұғаттап, жаппай қысқарту нәтижесінде жұмыстан босатылған қызметкерлерді жұмысқа қайтаруға міндеттеді, деп хабарлайды inbusiness.kz сайты Associated Press агенттігіне сілтеме жасап.
Сот төрағасы Джун Мён Джин өз қаулысында талапкерлер "қаржылық тұрақсыздық, кідірістер, маңызды ақпараттың шектелуі", сондай-ақ ең осал топтар үшін негізгі білім беру қызметтерінің жойылуы салдарынан қайтарымсыз зиян келтіру қаупін нақты сипаттағанын атап өтті.
"Бұндай көлемдегі қысқартулар министрліктің жұмысын іс жүзінде тоқтатады", – деп мәлімдеді сот төрағасы.
Ол Трамп әкімшілігінің "қайта құрылымдау" туралы мәлімдемесі министрліктің жабылуына қатысты шындыққа сәйкес келмейтінін атап өтті.
Наурыздағы қысқартулардан кейін министрліктен 1300-ге жуық адам жұмыстан шығарылды, нәтижесінде қызметкерлер саны 4100-ден 2000-ға дейін қысқарды. Ақ үй өкілі сот шешімін "құзыреттілікті асыра пайдалану" деп атап, реформаның мақсаты министрлікті жабу емес, оның тиімділігін арттыру екенін айтты.
Трамптың жарлығынан соң тек наурыз айында білім министрлігінің 1,3 мыңнан астам адам қызметкері жұмыстан босатылған еді. Сондай-ақ, мұғалімдерді оқыту және зерттеу жұмыстарына 1,5 миллиард доллардан астам келісімшарттар мен гранттар алынып тасталған.
