Астанадағы көптен күткен LRT желісі іске қосыла салысымен, бірінші күннен-ақ үлкен даудың астында қалды, деп хабарлайды Sn.kz ақпарат порталы.
Әлеуметтік желіде вагон ішіндегі ыстықтан қысылып, ауа жетпей жылаған балалар мен бұрқ-сарқ қайнаған халықтың видеосы тарап кетті.
Жолаушылардың айтуынша, олар жабық поезда 20 минут бойы «тегін саунада» тұншығып, сыртқа шыға алмай қалған.
Алайда, CTS компаниясы бұл жағдайға желдеткіштің бұзылуын емес, жолаушылардың өздерін кінәлап отыр.
Ресми мәлімдемеге сенсек, бейқам адамдар станциядағы авариялық тоқтату түймесін басып, есікті күштеп ашпақ болған.
Автоматтандырылған жүйе мұндай әрекетті қауіп деп қабылдап, поезды бірден бұғаттап тастаған көрінеді.
Бір қызығы, заманауи техника халықтың қарапайым қол тигізуінен-ақ сыр беріп, орта жолда тұрып қалатын болғаны ма?
Қалай болғанда да, миллиардтар жұмсалған жобаның алғашқы күндері-ақ халықтың жүйкесін жұқартып үлгерді.
