Александр Бублик Үлкен Дулыға турниріндегі екінші жеңісіне қол жеткізді. Қазақстандық теннисші АҚШ-тағы жарыстың 1/32 финалында аустралиялық Тристан СкулКейтпен кортқа шықты. Бубликтің жеңіске деген құлшынысы ә дегеннен-ақ көрінді. Бірінші сетті 6:3 есебімен жапты. Келесі кезеңде де отандасымыз басымдық тантты. Бубликтің мысы басты ма, әлде Тристан шаршады ма, екінші сетте де жағдай өзгере қойған жоқ. Дәл осындай есеп тіркелді. Матч тағдыры шешілер сәтте де еліміздің бірінші нөмірлі теннисшісі қарсыласын 6:3 есебімен жеңіп, жарыс жолынан шығарып тастады. Бір сағат 45 минутқа созылған матчта Бублик 16 эйспен бірге 6 брейк-пойнттың төртеуін сәтті пайдаланды. Енді жерлесіміз 1/8 финалға өту үшін әлемнің 14-ракеткасы, америкалық Томми Полдан айласын асыру шарт. Олар бұған дейін 6 рет кездескен. Соның бесеуінде Томмидің асығы алшысынан түскен. Ертең болатын матч кеткен есені қайтару үшін берілген жаңа мүмкіндік.
Асылбек Данияр
