Бағдарлама аясында жыл сайын шамамен 30 000 мемлекеттік қызметкерді қамту жоспарлануда
Бұл туралы Caravan.kz медиа порталы Sputnik.kz-ке сілтеме жасап хабарлайды.
Цифрлық даму, инновациялар және аэроғарыш өнеркәсібі министрлігі мемлекеттік қызмет істері агенттігімен бірлесіп мемлекеттік қызметшілерге арналған жасанды интеллект дағдылары бойынша AI Qyzmet оқыту бағдарламасын іске қосты.
Бағдарлама аясында жыл сайын шамамен 30 000 мемлекеттік қызметкерді қамту жоспарланған.
«AI Qyzmet Еуразиядағы мемлекеттік қызметшілерге арналған жасанды интеллект саласындағы алғашқы оқыту бағдарламасы. Бағдарламаның мақсаты — мемлекеттік қызметтің тиімділігін арттыру үшін жасанды интеллект құралдарын жұмыс үдерістеріне енгізу. Бұл мемлекеттік қызметтердің сапасын арттырып, шешім қабылдау үдерістерін жеделдетуге мүмкіндік береді», — деді Жаслан Мәдиев.
Министрдің айтуынша, Қазақстан мемлекеттік басқаруға жасанды интеллектті енгізіп жатқан алғашқы елдердің біріне айналуда.
Курс мемлекеттік қызметкердің күнделікті жұмысындағы жасанды интеллектті қолданудың негізгі сценарийлерін қамтиды: жоспарлау, ақпаратты өңдеу, презентациялар жасау, шешім қабылдау, тапсырмаларды автоматтандыру және көпшілік алдында сөз сөйлеу.
«Бұл курста заманауи тілдік модельдермен жұмыс істеудің әмбебап қағидалары ұсынылады, олар жасанды интеллектінің әртүрлі жүйелеріне оңай бейімделуге көмектеседі. ChatGPT-мен тиімді жұмыс істеуді меңгеру Claude (Anthropic), Gemini (Google), Perplexity, Mistral, Cohere және басқа да платформаларды сенімді қолдануға жол ашады», — делінген хабарламада.
Оқыту офлайн-форматта өтеді. Курсты аяқтағаннан кейін мемлекеттік қызметшілерге бірегей нөмірі бар сертификаттар табысталады.
