Боксшыларымыз Әлем кубогында тамаша өнер көрсетуде.
Қазақстандық боксшы Махмұд Сабырхан елордада өтіп жатқан бокстан Әлем кубогының кезеңінде тамаша өнер көрсетіп, жарыстың ширек финалына жолдама алды. 55 келіге дейінгі салмақ дәрежесінде сынға түскен Сабырхан өз мықтылығын тағы бір мәрте дәлелдеді.
1/8 финалдық кезеңде отандасымыз Оңтүстік Корея өкілі Шин Жаеонгпен қолғап түйістірді. Жекпе-жектің алғашқы раундынан бастап-ақ Махмұд қарсыласын қысымда ұстап, жоғары қарқынмен жұдырықтасты. Ол техникалық артықшылығын шебер пайдаланып, Жаеонгты екі мәрте нокдаунға түсірді. Төрешілер жекпе-жектің тағдырын ұзақ күттірмей-ақ, Махмұдтың айқын басымдығын тіркеді.
Алда оны ширек финалда Еуропа немесе Азия аймағынан шыққан мықты боксшылардың бірі күтіп тұр. Махмұдтың шаршы алаңдағы сенімді қадамы, шабуылдағы дәлдігі мен тактикалық сауаттылығы жанкүйерлерге үміт ұялатады.
Айта кетейік, бокстан Әлем кубогының бұл кезеңі Астанада алғаш рет ұйымдастырылып отыр. Оған әлемнің 30-дан астам елінен келген 250-ден астам былғары қолғап шеберлері қатысуда.
Махмұд Сабырхан құрамамыздың негізгі үміт артар боксшыларының бірі. Оның келесі кездесуі 3 шілдеге жоспарланған. Жартылай финалға жолдама беретін шешуші жекпе-жекте де ол бар күшін салып, ел намысын абыроймен қорғауға ниетті.
Сондай-ақ бүгін рингке шыққан бұрымды боксшымыз Әнел Сақыш әлем кубогындағы екінші жекпе-жегінде өзбек қызы Феруза Казаковаға жол берді.
