Елімізде өтетін әлемдік және дәстүрлі діндер көшбасшыларының VIII съезінен жаһан жұрты үлкен үміт күтіп отыр. Мәртебелі жиынды ұйымдастырып, дінаралық, ұлтаралық достықты нығайтқан Қазақстанның рөлін Еуропалық сарапшылар жоғары бағалауда. Шетелдік сыншылардың пайымынша , түрлі дін, ұлт өкілдерінің бір-біріне құрметпен қарауы – ел қауіпсіздігінің кепілі.
«Әлімсақтан бері көзқарасы қабыспайтын, бір-бірімен амандаспақ түгілі, қатар отырмайтын діндердің басшыларын бір үстелдің басына жинап, 8-рет диалог алаңын ұсынып отырған Қазақстан-жоғары құрметке лайық», – дейді Абдельазиз Аухаби. Бельгия мұсылмандары қауымдастығының өкілі әлемде бейбітшілікті қамтамасыз ету үшін дінаралық, конфессияралық келісімді күшейту маңызды екенін айтады.
Абдельазиз Аухаби, Бельгия мұсылмандары атқарушы комитетінің үйлестірушісі :
Әлемдік және дәстүрлі діндер көшбасшыларының конгресі өте маңызды жиын. Себебі, адамзат баласын түзу жолға салып, дағдарыстарға қарсы төтеп беру үшін барлық діндер күш біріктіруі тиіс. Ғаламда бейбітшілікті қалыптастыруға қомақты үлес қосып отырған Қазақстанның бастамаларына алғысымыз шексіз және сіздердің тәжірибелеріңіз жаһанға үлгі. Осы жиында дін жетекшілері қоғамды мазалаған өткір мәселелерге қатысты ұтымды ұсыныстарын ортаға салады деп үміттеніміз.
«Әйелдің әл-ауқатқа және қоғамның дамуына қосқан үлесі және әйелдің әлеуметтік мертебесін қолдаудағы діни қоғамдастықтардың рөлі». Мәртебелі жиында өзекті тақырып көтерілетіне Нэль Брудс қуанып отыр. Әйелдердің құқын қорғау ұйымы өкілінің айтуынша, соңғы жылдары дамыған елдердің өзінде нәзік жандыларға зорлық-зомбылық көрсету көбейіп, сый-құрмет азайған.
Нэль Брудс, Әйелдердің құқығын қорғау ұйымының өкілі:
Қыз-келіншектердің білім алып, лауазымды қызметтерде, қоғамның барлық саласында белсенді еңбек етуіне тең мүмкіндік туғызу қажет. Барлық діндердің мақсаты – адам баласын бір-біріне дос, бауыр қылу ғой. Дін көшбасшылары осы жиында соғысты тоқтатып, бір-бірімен қырықпышақ болған тараптарды бейбіт келісім жасауға шақырады деген сенімдеміз.
Геосаясат пен саяси текетірес өршіп тұрған тұста ұтымды диалог алаңының болуы – әлем үшін маңызды. Себебі, түйткілді мәселенің түйінін тек конструктивті диалогпен тарқату мүмкін. Еуропалық сарапшылар әртүрлі сенім-нанымдағы діни көсемдер Астанадағы басқосуда жаһанды бейбітшілікке үндейтін тың бастамалар көтеріп, конгрестен келісіп аттанатынына үміт артады.
Нұрсұлу Қасым
