Қызылордада екі «Келешек мектебі» ашылды .
Оның бірі облыс орталығындағы Арай мөлтек ауданында, екіншісі Қызылжарма ауылында салынды. Жаңа оқу жылы қарсаңындағы жаңа білім ошақтарының ашылу салтанатына Оқу-ағарту министрі Ғани Бейсембаев, облыс әкімі Нұрлыбек Нәлібаев қатысты.
Бұған дейн спорт залы, асханасы жоқ ескі ғимаратта білім алып келген нөмірі 15 мектеп-лицей оқушылары жаңа оқу жылын жаңа мектепте бастайды. 1 500 орынға арналған білім ұясы «Келешек мектебі» жобасы аясында бой көтерді. Мұнда жаратылыстану-математика бағытындағы пәндер тереңдетіліп оқытылады.
Нұрлыбек Нәлібаев, облыс әкімі:
- Облыстық бюджеттен 31 млрд 800 млн теңге бөлініп, өткен жылдың өзінде 13 білім нысаны салынып, ел игілігіне табысталды. Соңғы үш жылда облыстық бюджеттен бөлінген 5 млрд 700 млн теңгеге 9 мектептің жанынан қосымша жаңа мектепке бергісіз жаңа ғимараттар салынды. Біз сол арқылы үш ауысымдық мектептің мәселесін толығымен шештік. Мемлекеттік қолдау қоры арқылы 8 млрд 500 млн теңгеге 5 жаңа мектеп салынады деп жоспарлануда.
«Келешек мектебінің» тағы бірі Қызылорда қаласына қарасты Қызылжарма ауылынан ашылды. Бұл білім нысаны 600 орынға лайықталған. «Барлық пәндік кабинеттер уақыт талабына сай жабдықталған»,- дейді ұстаздар.
Сәкен Сағатбекұлы , технология пәнінің мұғалімі:
- Мектепке 3D аппараттары келген. Баламен жұмыс жасауға да ыңғайлы. Құрал-жабдықтар қазіргі заманға сай. СТМ станоктар, ағаш станогы, лэд экран да бар. Барлық қауіпсіздік ережесі сақталған.
Өңірде білім нысандарын жаңғырту жұмыстары жалғаса береді. Алдағы үш жылда 51 мектеп күрделі жөндеуден өтеді.
Нұрлан Жақыпбеков, Нұржан Мұзарапшин, Ақан Әлиев, 24KZ
