Конституция күні қарсаңында Алматыда елдегі алғашқы Цифрлық медицина орталығы ашылды.
Оның мақсаты — денсаулық сақтау жүйесінің ашықтығы мен тиімділігін арттыру. Цифрлық медицина орталығы емхана жұмысы мен тұрғындардың денсаулығын бақылап, өзара байланысты нығайтады. Енді пациентті скринингке, екпе салдыруға, флоюораграфиядан өтуге автоматты түрде жасанды интеллектке негізделген дауыстық көмекші шақырады. Мысалы, медбикелер бір жылдың ішінде тек флюорографиядан өту үшін шамамен 545 мың қала тұрғынына қоңырау шалады. Енді жаңа сервис оларды бұл жұмыстан босатады. Орталықта пациенттердің денсаулық жағдайын жылдам талдап, тұрақты байланыс орнатып отырады. Телемедициналық патронаж қызметі болса үйдегі пациенттерге онлайн көмек көрсетеді. Кейбір дәрігерлер қашықтан кеңес те береді.
Шырын Төлекова, Цифрлық медицина орталығы Телемедицина бөлімінің басшысы:
- Егер адамда шағым болса, 1312 нөміріне хабарласып, біздің дәрігерлерге шағымдарын айтуға болады. Біз оны 1 немесе 3 күн арасында шешуге тырысамыз. Күндіз-түні тәулігіне 24 сағат қоңырау қабылдаймыз және медициналық кеңес керек болса, дәрігерлер көмектесуге дайын.
