Қостанайда Конституцияның 30 жылдығына арналған салтанатты жиын өтті.
Мерекелік шараға түрлі сала қызметкерлері, қоғамдық ұйым, зиялы қауым өкілдері қатысты. Жиналғандар Ата заңымыздың құндылығы, тарихи маңызы туралы ой өрбітті. Ел дамуына елеулі үлес қосқандарға құрмет грамотасы табыс етілді.
«Конституциямыздың 30 жылдығы айшықты мереке. Қазақстан тарихындағы тағдырлы белес. Соңғы жылдары елімізде азаматтық белсенділік артты. Мемлекеттік басқару ісіне қоғамның ықпалы күшейді. Осының бәрі конституциялық реформалардың нәтижесі», -дейді сарапшылар.
Құмар Ақсақалов, облыс әкімі:
- Конституцияға соңғы жылдары еңгізілген өзгерістер елдің қоғамдық, саяси өміріне серпін берді. Қоғамның саяси мәдениеті мен белсенділігі артты. Ауыл әкімдерін тікелей сайлау тәжірибесі бесінші жыл жүзеге асырылуда. 2 жыл аудандар мен облыстық маңызы бар қалалар әкімдерінің тікелей сайлауы өтті.
Белгілі заңгер Сергей Жалыбиннің айтуынша, қазақ халқының ел басқару, заң шығару жүйесі ерте заманнан қалыптасқан. Қазіргі Ата заңмен сол дәстүр сабақтасып жатыр.
Сергей Жалыбин, Заң ғылымдарының докторы, профессор:
- Конституцияны талқылағанда қазақ халқының құқықтық негізі саналатын «Жеті жарғының» ереже қағидаларын сот төрелігі нормаларына еңгізгіміз келді. Сол кездегі талаптар заң, тәртіпке бағынатын жаңа жас толқын тәрбиелеуге сеп болар еді.
«Конституция – тек заңгерлердің ғана емес, әрбір қазақстандықтың өмірлік құжаты. Оны білу, құрметтеу әр азаматтың парызы және міндеті», — дейді ақын Серікбай Оспанов.
Серікбай Оспанов, Қазақстан жазушылар одағының мүшесі, ақын:
- Конституция – ең ардақты мерекелердің бірі ғой. Өйткені бұл — Ата заңы. Ата заңымыз өміріміздің мәні. Себебі бізді алға жетелейтін, биікке шығаратын, сол биікке шығаруға барлық жағдайды жасайтын осы — Ата заңымыз. Ата заңымыз мәңгілік болсын.
Мерекелік шара барысында еңбегімен ерекшеленген бірқатар азаматтарға облыс әкімінің құрмет грамотасы табыс етілді.
Мағауия Қалиев, Ермек Мұхамедияров, 24KZ
