Қарағанды қаласы маңындағы теміржол өткелінде жеңіл автокөлік жүк пойызына соғылып, 5 адам зардап шекті. Оқиғаның себептері мен мән-жайы тексеріліп жатыр, деп хабарлайды Egemen.kz.
«Қарағанды – Сортировко – Құлайғыр» учаскесінде болған жол-көлік оқиғасы бойынша полиция қызметкерлері қылмыстық іс қозғады. Алдын ала мәлімет бойынша, Audi маркалы автокөлік жүргізушісі тыйым салатын қызыл жарыққа қарамастан теміржол өткеліне кіріп кеткен. Сол мезетте өткелден жүк пойызы өтіп жатқандықтан, соқтығысудан қашып құтылу мүмкін болмаған.
«Соққы салдарынан 35 жастағы жүргізуші мен оның төрт жолаушысы әртүрлі дәрежедегі жарақат алып, дереу медициналық мекемелерге жеткізілді», деп хабарлады Қарағанды облыстық ПД баспасөз қызметі.
Қазір олардың жағдайын дәрігерлер нақтылап жатыр.
Полиция оқиғаның барлық қатысушыларының әрекетіне қолданыстағы заңнамаға сәйкес құқықтық баға беру мақсатында жан-жақты тергеуді бастады.
«Барлық кінәлілер заң бойынша жауапқа тартылады», деді ведомствоның баспасөз қызметі.
