Аталған байқау креативті индустрияға қызығушылығы бар жастарға арналған.
Energo University жанындағы Dala.edge креативті технологиялар паркі Қаскелеңде орналасқан New York Film Academy (NYFA) кампусында оқуға арналған арнайы гранттар конкурсын жариялайды, деп жазады inbusiness.kz сайты.
Бағдарлама аясында "3D-анимация және визуалды эффектілер" мен "ойын дизайны" бағыты бойынша 100 және 50 пайыздық грант ұсынылады.
Байқауға қатысу үшін үміткер креативті жұмыс дайындауы тиіс. Сондай-ақ 2025 жылдың 1 тамызына дейін Қазақстандағы New York Film Academy кампусының kaz.nyfa.edu ресми сайты арқылы өтінім беруі қажет. Өтінім жолдаған барлық талапкер байқауға қатысушы ретінде автоматты түрде тіркеледі.
Гранттық жоба NYFA халықаралық дипломын шетелге шықпай-ақ алуға бірегей мүмкіндік береді. Оқуын сәтті аяқтаған түлекке Нью-Йорк пен Лос-Анджелестегі академия кампустарында берілетін дипломмен тең арнайы сертификат табысталады. Дәрістерді АҚШ-тан келген оқытушылар жүргізеді.
Айта кетейік, NYFA-ның Қазақстандағы филиалы – Азиядағы жалғыз филиал.
