Бұл туралы Су ресурстары және ирригация министрлігі мәлімдеді.
Оңтүстік аймақтарда 59 мың гектарға жуық жерге су үнемдеу технологиялары орнатылған, деп жазады inbusiness.kz сайты.
Оның ішінде 15,5 мың гектарға жаңбырлатып суару жүйелері, 29,4 мың гектарға тамшылатып суару жүйелері қолданылған, ал 14,1 мың гектар жер лазерлік құрылғымен тегістелген. 2024 жылдың қорытындысына сәйкес, ел бойынша шамамен 158 мың гектар жерге су үнемдеу технологиялары енгізілген болатын. Оның ішінде оңтүстік өңірлерге тиесілісі – 130 мың гектар шамасында.
– Былтыр министрлігіміз фермерлердің су үнемдеу технологияларын сатып алуы мен орнатуына кеткен шығынның өтемақысын 30%-ға арттырды. Сонымен қатар суармалы суға сараланған субсидиялар енгізілді. Су үнемдеу жүйелерін қолданатын шаруалар үшін субсидия көлемі 60%-дан 85%-ға дейін ұлғайтылды. Мұндай технологияларды қолдану суармалы суды 30%-ға дейін үнемдеуге мүмкіндік береді, – деді ҚР СРИМ Су үнемдеу технологияларын дамыту департаментінің директоры Берікбол Мәндібаев.
Қазір Қазақстанда жаңбырлатып және тамшылатып суару қондырғыларын шығаратын 4 отандық зауыт жұмыс істейді. Олар Түркістан облысында және Астана мен Алматы қалаларында орналасқан. Сондай-ақ, осы жылы Түркістан облысында тамшылатып суару жабдықтарын шығаратын үш зауыт ашу жоспарланып отыр.
