Жетісу облысы мен ҚХР арасындағы ынтымақ аясында іскерлік кездесулер тұрақты түрде өтіп келеді. Себебі өңірдің 700 шақырымдай шекарасы осы елмен шектеседі. Облыс аумағында көрші елге шығатын екі ірі көлік логистикалық дәліз бар. Бүгінде Жетісу облысы Қытайлық инвесторлармен бірлесе түрлі бағыттағы жобаларды іске асыруда.
Өткен жылдың қазан айында Жетісу облысы мен ҚХР арасында келісім шарт жасалып, меморандумға қол қойылды. Қос тарап энергия көзін жаңартып, туризм және ауыл шаруашылығын дамыту мақсатындағы жобаларды қолға алды. Солардың бірі осы жүгері өңдеу зауыты. Тартылған инвестиция көлемі 1 млрд. теңгеден асады.
Зауыт күніне 120 тонна жүгері өңдейді. Бұршақты кептіретін арнайы қондырғысы бар. Бүгінгі таңда 30-дан астам адам жұмыспен қамтылған.
Жалпы Жетісу облысында қытайлық инвесторлармен бірлескен 25 жоба бар. Тартылған инвестицияның құны 476 млрд. теңге.
Серік Сәбитайұлы, Жетісу облыстық кәсіпкерлік басқармасының басшысы:
Бүгінгі таңға 25 жобаның 15 бірлескен жобасы іске қосылып, инвестиция 80 млрд теңгені құрап, 200 ден астам адам жұмыспен қамтылған. Осының ішінде 90 пайызы жергілікті тұрғындар, яғни Қазақстан азаматтары.
Алдағы уақытта өңірде жел қондырғыларын шығаратын зауыт ашылады. Ол энергия көзін үнемдеуге көмектеседі. Бұдан өзге аймақта тағы да 9 жоба іске қосылады.
Дамир Нұрмұхамет
