”Әкем - қазақ”: Футболдан жастар құрамасының капитаны ұлтына қатысты сұрақтарға жауап берді

Бұл туралы Caravan.kz медиа порталы хабарлайды.

Футболшы спорт журналисі Аслан Қаженовке берген сұхбатында әкесі қазақ, шешесі неміс ұлтынан екенін айтқан.

“Мен қазақпын. Әкем қазақ, анам неміс. Отбасымда бәрі қазақша түсінеді, бірақ көп сөйлемейді. Таразда, аулада балалармен жүріп, қазақ тілін үйренгенмін. Команда да көбіне өзара қазақ тілінде сөйлесеміз”, — дейді ол.

Азамат Тұяқбаев капитан болудың жауапкершілігі көп екенін де тілге тиек етті.

“Осы жылы капитан болдым. Жауапкершілік үлкен. Мен U17-де тіпті мені шақырмады, ұлттық құрамада да болған жоқпын. Қазір шақырды, капитан болып, өзімді көрсетіп, дәлелдедім. Ең бастысы, маған командадағы балалар сенді. Мені көшбасшы ретінде көрді. Сол үшін командаға рақмет.

Ары қарай элиталық раундтың топтық кезеңі өте қиын болады деп ойлаймын. Себебі, мықты клубтар, яғни бір топтан бір ғана команда келесі кезеңге өтеді. Сол үшін өзімізді көрсетуіміз керек ”, — дейді ол.

Сондай-ақ, ол Еуропаның кез келген командасында ойнауды мақсат тұтқанын да жасырмады.

”Негізі “Барселонада” ойнауды армандаймын. Бірақ, қазір Еуропаның кез келген командасына кетіп қалсам деп ойлаймын. Себебі, ол жақта қатты өсесің. Екінші лигаға болсын кетіп қалсам, өте қуанышты боламын”, — дейді Азамат Тұяқбаев.

Еске сала кетейік, футболдан 17 және 19 жасқа дейінгі ұлттық құрама футболдан алғаш рет Еуропа чемпионатына іріктеудің элиталық кезеңі — “А” лигасына жолдама алып, тарихи нәтижеге қол жеткізді. Қазақ жастары енді Испания, Англия, Италия секілді Еуропаның кіл мықты командаларымен ойнайтын болады.