Бұл туралы Ұлттық статистика бюросы хабарлады.
Өзбекстаннан келушілердің үштен екі бөлігі – қазақтар. Олар көбіне Қазақстанның оңтүстік және батыс аймақтарын таңдап отыр, деп жазады inbusiness.kz сайты.
Қоныстанатын өңірлер бойынша көрсеткіш: Алматы облысы – келгендердің 41%-ы, Маңғыстау облысы – 22%-ы.
Қаңтар-қыркүйек айлары аралығында Қазақстанға басқа елдерден тұрақты тұру үшін 16,2 мың адам келсе, оның 8,3 мыңы, яғни 51%-ы бұрын Өзбекстанда тұрғандар екен.
Бұдан да көп көрсеткіш соңғы рет 2013 жылы тіркеліпті. Ал елдің жалпы иммиграциядағы үлесі 2014 жылдың қаңтар-қыркүйегінен бері алғаш рет 50%-дан асып отыр.
Өзбекстаннан келушілердің үлесінің 50%-ға жуық деңгейі 2010 жылдары байқалған. Бірақ кейін бұл көрсеткіш те, республикадан келген иммигранттардың жалпы саны да төмендеген.
Айта кетерлігі, 2016 жылдың қаңтар-қыркүйегіне қатысты егжей-тегжейлі деректер жоқ. Алайда, белгілі болғаны – сол жылы Өзбекстанның үлесі жыл қорытындысы бойынша тек 37% болған.
Өзбекстаннан келгендердің саны биыл былтырғы жылмен салыстырғанда 11%-ға ғана артқан. Алайда елдің иммиграциядағы үлесі бірден 15 пайыздық тармаққа артты. Себебі иммигранттардың жалпы саны былтырғы 20,4 мыңнан биылғы 16,2 мыңға күрт төмендеді.
Мұның негізгі себебі:
- Ресейден тұрақты тұруға келгендердің саны 47%-ға азайған (3,1 мың адамға дейін).
- Моңғолиядан келгендер 71%-ға төмендеп, 0,3 мың адамға дейін қысқарған.
