Мемлекеттік кірістер комитетінің бас маманы Үкімбаев өмір бойы мемлекеттік қызметте және квазимемлекеттік сектор субъектілерінде қызмет атқару құқығынан айырылды.
Жамбыл облысының қылмыстық істер жөніндегі мамандандырылған ауданаралық соты облыстық мемлекеттік кірістер департаментінің бас маманы С.Үкімбаевқа, Тараз қаласының тұрғындары Э. Мурадовқа және Т. Телеуовқа қатысты үкім шығарды, деп жазады inbusiness.kz сайты.
"Мұрадов пен Телеуов қалалық қаржы бөлімінің лауазымды адамдарына бұрын тәркіленген және соттың шешімі бойынша жойылуға жататын темекі өнімін бергені үшін 200 мың АҚШ доллары сомасында пара бергені үшін, ал Үкімбаев – парақорлыққа делдал болғаны үшін кінәлі деп танылды", – делінгген сот хабарламасында.
Сот үкімімен Мұрадовқа 10 жыл, Телеуовқа – 9 жыл, Үкімбаевқа 3 жыл бас бостандығынан айыру жазасы тағайындалды.
Сот актісі заңды күшіне енген жоқ.
