Халық мұны бюджет қаржысын тиімсіз жұмсау деп санайды.
Атырау қаласының "Алмагүл" ықшам ауданында бір ғана аулаға қатарластырып 54 орындық орнатылуы тұрғындардың наразылығын тудырды, деп жазады inbusiness.kz сайты.
Аталған аулада балалар алаңы мен футбол алаңы салынғанымен, тұрғындар орындықтардың шамадан тыс көптігіне қынжылады. Айтуларынша, қаз-қатар тізілген орындықтардың көбі бос тұрады.
– Кілең орындық. Шынымды айтсам, бәрі қажет емес. 10–20 орындық жетіп жатыр еді, – дейді қала тұрғыны Жұмағали Ерғалиев.
Жобаны жүзеге асырған шенеуніктер бір метр сайын орналастырылған 54 орындықты "100 аула" бағдарламасының талаптарына сай орнатылғанын айтады. Аталған орындықтарға жалпы 3 миллион теңге жұмсалған.
– Бұл аулада адамдар көп болған соң осындай шешім қабылданды. Жобада қалай көрсетілсе, солай орындалды. Аулада орын жетпеген соң бәрі бір қатарға қойылды, – деп түсіндірді қалалық тұрғын үй-коммуналдық шаруашылығы бөлімінің өкілі Ербол Айтқалиев.
Ал қоғам белсенділері мұндай шығынды ақтауға болмайды деп санайды. Олардың сөзінше, қалада әлі күнге дейін бірде-бір орындық орнатылмаған аулалар жетерлік.
– Бұл – ақшаны желге ұшырғанмен бірдей. Бір ауланы толтырып қоймай, басқаларға да жеткізу керек еді. Қалада демалатын орын жетіспейді. Бұл қалай есептелді, түсінбеймін, – дейді қоғам белсендісі Нұрлан Жүнісов.
Жергілікті билік өкілдерінің мәліметінше, жыл соңына дейін қалада ойын және спорт алаңдары, жаяу жүргіншілер жолы мен түнгі шамдар орнатылады. Ал "100 аула" жобасы аясында тағы 99 аулаға дәл осындай – әрқайсысына 54 орындықтан қою жоспарланған.
