АҚШ пен Қытай арасындағы тарифтік қақтығыс Нидерландыдағы Роттердам портына келетін жүктердің қозғалысын қиындатты, деп хабарлайды 24kz.
Салдарынан Еуропаның ең ірі сауда торабында кеме кептелісі орын алып, порттағы кезек орта есеппен тоғыз күнге созылып отыр. Бұл құрлықтың ішкі аймақтарына мұнай, көмір, болат және ауылшаруашылық өнімдерін жеткізуді кешіктіріп, кәсіпорындарға ауыр соққы болды.
Аида Қыдырбай, тілші:
- Аумағы 12 000 гектар, ұзындығы 40 шақырымға созылып жатқан Роттердам порты Азия мен Еуропа арасындағы ең маңызды сауда қақпасы әрі Еуропаның негізгі логистикалық түйіні. Әлемдегі ең автоматтандырылған порттардың бірі саналатын бұл сауда торабы жыл сайын шамамен 15 млн контейнер жөнелтеді. Алайда Роттердам порты тамызда тоқырауға тап болды: АҚШ пен Қытай арасындағы тарифтік қақтығыстар хаб жұмысына айтарлықтай әсер етіп, кемелер кептелісіне әкелді. Биыл алғашқы жартыжылдықта жалпы жүк өңдеу көлемі 4%-ке төмендеген.
Барт Кейперс, Контейнерлік логистика саласының маманы, экономист:
- АҚШ Қытайдан келетін тауарларға 30%, ал Қытай АҚШ тауарларына 10% тариф енгізгені мәлім. Алайда екі ел арасындағы баж салығы әзірге күшіне енген жоқ. Әзірге АҚШ пен Қытай «сауда тыныштығын» сақтап отыр. Дегенмен, тарифтер 10 қарашадан кейін бәрібір күшіне енетінін ескерген сауда компаниялары тауарларын тезірек жөнелту үшін жанталасып жатыр. Қытайдан АҚШ-қа бағытталған контейнерлік жүк көлемі 300%-ке дейін артты.
Роттердам порты арқылы Қытайдан Еуропаға, оның ішінде Германия, Франция және Бельгия зауыттарына мұнай, көмір, болат және ауылшаруашылық өнімдері тасымалданады. Одан бөлек, Еуропа нарығы Қытайдан келетін электроника, автокөлік бөлшектері мен химикаттарға да тәуелді. «Сондықтан АҚШ-Қытай арасындағы сауда тізбегі бұзылса, оның салдары бүкіл әлемге, оның ішінде Еуропаға да әсер етпей қоймайтыны мәлім», — деп дабыл қағады сарапшылар.
Альберт Веенстра, Роттердам басқару мектебінің тауар және логистика бойынша профессоры:
- Қазіргі тарифтік қақтығыстардың кесірі тек АҚШ пен Қытай арасында ғана емес, жаһандық деңгейде сезіледі. Мәселен, Еуропаға импортталған көмірдің шамамен 30%-і, болат өнімдерінің 230%-і,сырттан келеді. Тауар кешіккен сайын Еуропадағы зауыттардың өндіріс қарқыны баяулап, өнім бағасы өсіп отыр.
Еуропадағы ең ірі Рейн өзеніндегі су деңгейі бұрын-соңды болмаған көрсеткішке төмендеп, тауар тасымалына қосымша қиындық келтіріп тұр. Рейн мен Роттердам порттары бір-бірімен тығыз байланысты. Өйткені Швейцариядан басталып, Германия мен Нидерланд арқылы өтетін өзеннің Солтүстік теңізге құятын түйіскен жерінде Роттердам порты орналасқан. Рейндегі су деңгейі төмендеген сайын баржалар жүкті толық қабылдай алмай қиналады. Мәселен, бір баржа 1500 контейнер тасымалдайтын болса, су деңгейі төмендеген кезде 900 контейнерді ғана ала алады. Бұл Роттердам портына контейнер жеткізу уақытын 80 сағатқа дейін ұзартып отыр.
Авторы: Аида Қыдырбай, Дмитрий Рогач
