Елімізде дәрілік заттар мен медициналық бұйымдарды «бір терезе» қағидаты бойынша 100 жұмыс күні ішінде тіркеуге мүмкіндік беретін пилоттық жоба іске қосылды. Мақсат – препараттардың бағасын төмендету, олардың қолжетімділігін арттыру.
Шекті бағаны реттеудің жаңа тетігі тегін мемлекеттік дәрі-дәрмек тізіміндегі препараттарға қолданылады. Нәтижесінде амбулаториялық және стационарлық емге арналған дәрілік заттардың бағасы 19%-ке дейін, ал бөлшек дәріханалардағы препараттардікі 30%-ке дейін төмендейді. Тиісінше жаңа механизм алыпсатарлықтың алдын алып, бағаның себепсіз өсуіне тосқауыл қоймақ. Өткен жылы 1 шілдеден бастап енгізілген дәрі-дәрмектерді міндетті таңбалау және қадағалау жүйесінің арқасында 366 миллион препарат таңбаланып, оның 250 миллионнан астамы айналымға жіберілді. Ал 81 миллионы сатылымнан алынып тасталды.
Ержан Нұрлыбаев, ҚР денсаулық сақтау вице-министрі:
– Дәрілік препараттардың бағасын реттеу моделі өзгертілді. Дәрілік заттар құнының өсуіне әсер еткен маркетингтік, кедендік және көлік шығындары алынып тасталды. Сондықтан қазір препараттардың нақты бағасы зауыттағы негізгі құнына сәйкес қойылады. 1 шілдеге дейін ел аумағында тіркелген барлық дәрілік заттар қайта тексеріледі. Қазір аталған модельді апробациялау бойынша фармацевтикалық қауымдастықпен келіссөз жүріп жатыр.
