Бұқаралық ақпарат құралдары күніне орай елордада QAZCONTENT OPEN 2025 атты шахмат турнирі өтті, деп хабарлайды El.kz интернет порталы. Шаран «Qazcontent» АҚ, Қазақстан шахмат федерациясы және Білім беруді тұрақты дамыту қорының бастамасымен ұйымдастырылды. Жарыс Spaces коворкинг орталығында өткізілді.
Турнирге отандық бұқаралық ақпарат құралдарының 40-тан астам өкілі қатысты. Қатысушылар арасында баспа, телеарна, радио және интернет журналистері бар. Жарыс блиц форматында швейцар жүйесімен (7 тур) өтіп, жартылай финал мен финал ойындары нокаут тәртібімен ұйымдастырылды.
Жеңімпаздар:
-
1 орын — Рүстем Омаров («Elkz» ақпараттық агенттігі)
-
2 орын — Нұрлан Салықбаев («Қазақстан» телеарнасы)
-
3 орын — Мерей Ермұханов (IQas_astana CEO-сы)
Сонымен қатар, «Үздік инфлюенсер» номинациясы блогер Сергей Хванға табысталды.
Ал «Қазақстан» телеарнасының журналисі Ляззат Тушкенова турнирдің белсенді қатысушысы ретінде марапатталды.
Турнирге «Хабар», Qazsport, Informburo, Tengrinews, Литер, «Егемен Қазақстан» және өзге де жетекші БАҚ-тың өкілдері қатысты.
«Шахмат ойыны журналистер үшін аса маңызды дағдылар – стратегиялық және сыни ойлау, жедел шешім қабылдау қабілеттерін дамытады. Блиц форматындағы партиялар редакциялық жұмыстың қарқынымен ұқсас. “Qazcontent” медиахолдингі мұндай зияткерлік бастамаларды қолдауға әрқашан дайын», – деді «Qazcontent» АҚ креативтік дирекция басшысы Жандос Смайлов.
Қатысушылар турнирдің жоғары деңгейде ұйымдастырылғанын атап өтіп, еркін диалог пен тәжірибе алмасуға мүмкіндік бергені үшін алғыс білдірді. Жеңімпаздар арнайы дипломдармен және ақшалай сыйлықтармен марапатталды.
