15 желтоқсанға қараған түні Шоссе көшесінде Mitsubishi Shariot маркалы жеңіл автокөлік жол жиегінде тұрған Shackman фурасына соғылды, деп хабарлайды Zakon.kz.
Түннің бір уағында жеңіл көлік жолдың шетінде тоқтап тұрған фураға жоғары жылдамдықпен соғылып, қатты соққының салдарынан оның астына кіріп кеткен. Mitsubishi автокөлігінің рөлі оң жақта орналасқанын ескерсек, жүргізушінің аман қалғаны – нағыз ғажайып.
Сонымен қатар жеңіл автокөліктің газ қондырғысымен жабдықталғаны белгілі болды. Қақтығыстан кейін газ баллоны көліктен түгелдей жұлынып кеткен. Абырой болғанда, жарылыс орын алған жоқ.
Оқиға орнына жедел түрде шұғыл қызметтер жетті. Домкраттың көмегімен фура көтеріліп, қатты зақымданған автокөлік пен зардап шеккен жүргізуші сыртқа шығарылды.
Әртүрлі дене жарақаттарын алған ер адам жедел түрде ауруханаға жеткізілді.
Белгілі болғандай, куәгерлер жеңіл көлікті дер кезінде өрт сөндіргішпен өңдеп үлгерген. Олардың айтуынша, жүргізушінің жолы болған. Ол көлікке қысылып қалғанына қарамастан тірі қалды, екіншіден көлік дер кезінде өңделіп, өртенбеді.
Қазір жол полициясының қызметкерлері жол-көлік оқиғасының барлық мән-жайын анықтап жатыр.
Бұған дейін Павлодарда есірткі таратушы ұсталғанын жазғанбыз.