Бұл қадам Мемлекет басшысының кәсіби футбол клубтарын жекешелендіру жөніндегі тапсырмасын жүзеге асыру аясындағы шешімдердің бірі.
Петропавлда "Қызылжар" футбол клубының спорттық бренді, инфрақұрылымы мен активтерін жеке меншікке беру туралы келісімге қол қойылды.
Құжат клубтың ҚФФ, FIFA және UEFA ұйымдастыратын жарыстарға қатысуына байланысты барлық құқықтар мен міндеттемелердің жаңа иесіне ауысуын бекітеді.
Клубтың инвесторы кәсіпкер Сергей Кан. Жаңа заңды тұлға– "QYZYLJAR" футбол клубы атты жеке мекемені тіркеді. Команда өзінің атауын, клубтық түстерін және тауар белгісін сақтайды.
Бас менеджер ретінде тәжірибелі маман Әлішер Апсалямов тағайындалды. Ол бұған дейін Sarajevo, Cardiff City, "Қайрат", "Каспий", "Атырау" және "Тобыл" клубтарында тәжірибе жинаған.
