Жоба Халықаралық атом энергиясы агенттігі (МАГАТЭ) мен БҰҰ-ның Азық-түлік және ауыл шаруашылығы ұйымының (ФАО) қолдауымен жүзеге асырылып отыр.
Марокконың Агадир қаласында цитрусты дақылдарды ауыл шаруашылығы зиянкестерінен қорғауға арналған алғашқы стерильді шыбын өндіретін зауыт ашылды, деп жазады inbusiness.kz сайты.
Зауыттың жұмысы стерильді жәндіктер технологиясына негізделген. Бұл әдісте еркек шыбындар сәулелендіріліп, көбею қабілетінен айырылады. Оларды табиғи ортаға жіберу арқылы зиянкестердің саны азаяды. Нәтижесінде химиялық пестицидтерге тәуелділік төмендеп, экологиялық қауіпсіздік қамтамасыз етіледі.
Кәсіпорынның басты мақсаты азық-түлік қауіпсіздігін нығайту және цитрусты дақылдар өндірісін арттыру. Бұл сала Мароккода мыңдаған отбасының негізгі табыс көзі болып саналады.
Сарапшылардың пікірінше, аталған жоба Марокконы ауыл шаруашылығындағы зиянкестермен заманауи ғылыми тәсілдер арқылы күресетін елдердің алдыңғы қатарына шығарады. Сонымен бірге, экология мен агросектордағы жаһандық мәселелерді халықаралық деңгейде шешуге үлес қосады.