Қытайда робот өндірісінің қарқыны артты. Бұған жасанды интеллектінің дамуы тікелей әсер етіп отыр.

Биыл алты айда көрші ел 550 мыңнан астам робот шығарды. Құлтемірдің басым бөлігі өндіріс және қызмет көрсету саласына арналған. Енді ел үкіметі салаға көптеп қаржы құймақ.

Қытайда робототехника ерекше жылдамдықпен дамып барады. Дәл қазір осы саламен байланысты 930 мың кәсіпорын жұмыс істеп тұр. Олардың 100 мыңға жуығы биыл ашылған. Бүгінде құлтемірдің мүмкіндіктері 50-ден астам салада қолданылады.

Яо Цичжи, Ақпараттық ғылымдар және жасанды интеллект институтының жетекшісі:

- Қазір Қытай ғалымдары жаңа деңгейге көтерілді. Ғылыми-техникалық мүмкіндік артты. Сонымен қатар роботтардың икемділігі жақсарды. Тек адамға ұқсас роботтар ғана емес өндірістегі құлтемірлер де қарқынды дамып келеді. Сұраныс та жылдан жылға өсіп жатыр. Робот шығаруды көбейте береміз.

Қытайда робототехника мен жасанды интеллект қатты дамыған қаланың бірі Шэньчжэнь. Мұнда «роботтар аңғары» деп аталатын арнайы инновациялық дәліз бар. Оның ұзындығы 10 шақырымнан асады. Осы жерде робот өндірісіне қажетті бөлшектер, қондырғыларды шығару, модельдеумен айналысатын компаниялар шоғырланған. Олардың әрқайсысы өз өнімін ұсынып бір-бірін қажетті бөлшектермен қамтамасыз етеді. Тәжірибе алмасып кемшін тұстарын жетілдіреді.

Цзян Лэй, Гуманоид роботтар өндірісі жөніндегі ұлттық және жергілікті инновациялық орталықтың бас зерттеушісі:

- Қаржыландырудың арқасында бүгінгі жетістікке жеттік. Гуманоид роботтар өндіріс саласын автоматтандырудағы техникалық кедергілерді жояды. Бұған дейін қиындықтар құлтемірлердің интеллектік әлсіздігінен болған еді. Енді мәселе шешілді. Алдағы үш жылда гуманоид роботтар дүкендерде, сауда орындары мен банктерде қызмет көрсету саласына толықтай енеді.

Ли Ян, Deep robotics компаниясының менеджері:

- Гуманоид роботтар индустриясы қарқын алды. Қаржыландыруға 2 млрд АҚШ доллары бөлінді. Біз бұл қаражатты үш бағытта жұмсаймыз. Ең бірінші ғылыми зерттеу, одан кейін робот өндірісіне қажетті өнімдер мен технологияға және ең бастысы мықты мамандарды тартуға бөлеміз. Қазір бұл бағытқа 70 млн доллар қарастырылып отыр.

Қытай робототехника нарығында 12 жыл қатарынан алда келеді. Мәселен осыдан оншақты жыл бұрын елде 33 мың робот жасалса, қазір оның көлемі 556 мың данаға дейін жетіп отыр. Ал түскен табыс 27 пайызға өсті. Салада қытай ғалымдары 190 мыңнан астам тың жобаны патенттеген.

Руслан Бақытбекұлы, Мадияр Ерсайын, 24KZ