Қонаев қаласында Конституцияның 30 жылдығына орай өңірдің дамуына үлес қосқан азаматтар марапатталды.
Салтанатты шараға қоғам қайраткерлері мен зиялы қауым өкілдері, мемлекеттік қызметшілер мен қоғамдық ұйым мүшелері қатысты. Сонымен қатар бүгін бірқатар әлеуметтік нысан қолданысқа берілді.
Алматы облысының әкімі қатысқан мерекелік жиында құқықтық мемлекетті нығайтуға және өңірдің қоғамдық өміріне үлес қосқан 30-ға жуық азамат марапатталды. Ал мерекенің басты сәтінде 55 метрлік тұғырға Мемлекеттік ту көтерілді. Бұл рәсім Конституцияның 30 жылдығына әрі Қонаев қаласының 55 жылдығына арналды.
Асқар Ыбырайымов, қала тұрғыны:
- Қазақстан Республикасының халқын Конституция күнімен құттықтаймыз. Өте үлкен мереке. Еліміз тыныш, халқымыз аман болсын.
Қазыбек Дәуіталиев, Алматы облысы қоғамдық кеңесінің төрағасы:
- Конституция бұл мемлекеттің тәуелсіздігін паш ететін, адам құқығын дәріптейтін және ең 21 ғасырдағы басты мәселе жергілікті демократияны дамытуға жол ашатын негізгі құндылық. Конституция бұл біздің тұрақты дамуымызға, қоғам ретінде алдыға қарай жүруімізге алып келетін басты құжат. Конституция күні құтты болсын. Конституциялық құрылыс негіздері мызғымасын.
Ата Заңның мерейлі датасына Алматы облысында әлеуметтік маңызы бар 17 нысан пайдалануға берілді. Оның ішінде 11 мектеп, медициналық пункт, мәдениет үйі, халыққа қызмет көрсету орталығы және өндірістік кәсіпорындар бар. Сонымен қатар электр желілері жаңартылды. Ал Қонаев қаласында 42 отбасы жаңа пәтер кілтін алды.
Марат Сұлтанғазиев, облыс әкімі:
- Ата Заң мемлекетіміздің даму бағдарын айқындап, барлық саладағы жетістіктердің негізіне айналды. Соның нәтижесінде халықтың әл-ауқаты артып, тұрмыс сапасы жақсарды, әлеуметтік қорғау жүйесі нығайды, азаматтардың құқықтық мәдениеті дами түсті. Алматы облысы да құрылған сәттен бастап тұрақты өсімді көрсетіп келеді. Өткен жылдың қорытындысы бойынша жалпы өңірлік өнімнің көлемі 6 трлн теңгені құрады.
Жалпы Конституция күніне орай Алматы облысында 180-нен астам шара өтті. Оларға 30 мыңға жуық адам қатысты.
Гүлім Советқан, Аманжол Жөнкешов
