Елордалық хоккейшілер құрамы жаңа легионерлермен толыққанымен, маусым бастала салып көңіл көншітерлік нәтиже көрсете алмады.
Астаналық "Барыс" Магнитогорскіде өткен Ромазан мемориалы турниріндегі соңғы матчын өткізді.
Михаил Кравец "Металлургке" қарсы ойынға мына құрамды шығарды: Шутов (Шестаков) — Бекетаев-Данияр, Галимов-Өмірбеков-Веккьоне; Королёв-Бреус, Савицкий-Мұхаметов-Қайыржан; Никитин-Оразов, Асетов-Шайхмедденов-Оспанов; Ляпунов-Логвин-Симонов, Решетько.
Алғашқы кезеңде шайба соғылмады. Екінші кезеңде ресейліктер есеп ашқанымен, Аңсар Шайхмедденов таразы басын теңестірді. Барлығы шешуші үшінші кезеңге қалды. Онда "Металлург" жеңісті жұлып әкетті — 2:1.
Бұған дейін қазақстандық клуб Жоғарғы хоккей лигасының "Магниткасына" 1:2 есебімен жол берген. Кейін овертаймда Уфаның "Салават Юлаевын" 4:3 есебімен ұтқан еді. Нәтижесінде екі-ақ ұпай жинаған "Барыс" турнир кестесінде соңғы орынға тұрақтады.
