Танымал әнші Серік Ибрагимов алдағы “Қайрат – Реал Мадрид” ойынына байланысты қызықты мәлімдеме жасады, деп хабарлайды Skifnews.kz ақпарат порталы.

Әнші әлеуметтік желідегі жазбасында:

“Алматылықтарға айтарым бар! Орталық стадионның қасында орналасқан үйімді сатамын. Біздің үйден стадионда өтетін ойындардың барлығы анық көрінеді”, – деді.

Айта кетейік, 28 тамызда Монакода УЕФА Чемпиондар лигасының жеребе тарту рәсімі өтті. Нәтижесінде “Қайраттың” қарсыластары белгілі болды. Алматыға мадридтік “Реал Мадрид”, бельгиялық “Брюгге”, грекиялық “Олимпиакос” және кипрлік “Пафос” командалары келмек.

Сонымен қатар, қазақстандық клуб сырт алаңда миландық “Интер”, лондондық “Арсенал”, лиссабондық “Спортинг” және даниялық “Копенгагенге” қарсы ойнайды.

Чемпиондар лигасының жалпы кезең ойындары 16 қыркүйектен басталып, 28 қаңтарға дейін жалғасады. Матчтардың нақты кестесі 30 тамызда белгілі болады.