2025 жылдың алғашқы жартысында оңтүстік астанада 19 мыңнан астам бала туылған. Жүкті әйелдерді босандыруға 5,4 млрд теңге жұмсалған. Медициналық сақтандыру қорының Алматы қалалық филиалының мәліметінше, босандыруға кететін шығындар толығымен МӘМС қаражаты есебінен жабылады. Ал босануға кететін шығын оның күрделілігі мен босандыру әдісіне байланысты өзгеріп отырады. Мысалы, әйел өз күшімен, қиналмай босанса, тарификатор бойынша 100 мың теңге, кесарь тілігімен босанған жағдайда 1,3 млн теңгеге дейін төленуі мүмкін, деп хабарлайды Egemen.kz.
Бүгінгі таңда Алматыда 6 перзентхана бар. Олардың бәрі де қалыпты және күрделі жүктілікпен келген әйелдерді босандыруға, сондай-ақ кесарь отасын жасауға маманданған. Жүкті әйелдер МӘМС жүйесінде бұдан басқа прегравидті даярлық, яғни жүктілікті алдын-ала жоспарлау, әйелді бала көтергенге дейін тексеріп, емдеп, түрлі дерт салдарынан жүктілік кезінде болатын асқынулардың алдын алу сынды көмек түрлерін пайдалана алады.
Мәселен, 2025 жылы бұл бағдарламаға Қор тарапынан 673 млн теңге қарастырылған.Оған қоса жүктілік кезінде акушер-гинекологтың тұрақты бақылауында болу, жоспарлы анализдерді тапсыру, ультрадыбыстық зерттеуден, скринингтерден өту, салалық мамандар көмегіне жүгіну т.б. қызметтер бар. Бұған Қор 3,8 млрд теңге бөлген.
Сол сияқты қалыпты босандыру, кесарь тілігімен ота жасау, дәрі-дәрмектермен, қосалқы материалдармен қамтамасыз етуге 12 млрд теңге қарастырылған.
Қазақстанда жұмыс істейтін жүкті әйелдерге МӘМС үшін жарнаны жұмыс беруші, жұмыс істемейтіндер үшін мемлекет төлейді. Бала дүниеге келген сәттен бастап 18 жасқа дейін мемлекет тарапынан сақтандырылады.
«Біздің елімізде барлық әйел сақтандырылған. Олардың әрқайсысы тегін босануға хақылы. Босандыруға кететін шығын қанша болса да МӘМС есебінен төленеді», — дейді Алматы филиалы директорв Ілияс Мұхамеджан.
