Патрульдік полиция күшейтілген режимде тәулік бойы қызмет атқарады
Бұл туралы Caravan.kz медиа порталы Sputnik.kz-ке сілтеме жасап хабарлайды.
Төрт өңірдің полицейлері ұлы ақын және ойшыл Абай Құнанбайұлының 180 жылдық мерейтойына арналған басты іс-шаралар өтіп жатқан Қарауыл ауылында қоғамдық тәртіпті сақтау үшін күш біріктірді.
Аймақ полициясының мәліметінше, бұл күндері Абай облысына шетелдік туристерді қоса алғанда, мыңдаған қонақтар келіп жатыр.
«Қоғамдық тәртіп пен азаматтардың қауіпсіздігін сақтау мақсатында 500-ден астам полиция қызметкерінен тұратын өңіраралық біріккен жасақ құрылды. Құрамында Шығыс Қазақстан облысынан – 64, Павлодар облысынан – 63 және Қарағанды облысынан – 33 қызметкер бар», — деп жазылған хабарламада.
Патрульдік полиция күшейтілген режимде тәулік бойы қызмет атқарады. Ерекше назар халық көп жиналатын орындарға, жаяу жүргіншілер аймақтарына және автожол бағыттарына аударылған.
Жаяу және автопатрульдеу күшейтіліп, тірек бекеттері мен жедел әрекет ету топтары кез келген жағдайда жедел көмек көрсетуге дайын, деп хабарлады Абай облысының полиция департаменті.
