Қазақстанның экология және табиғи ресурстар министрі Ерлан Нысанбаев Батыс Қазақстан облысының фермерлерімен кездесу барысында киіктердің санын реттеу шаралары қайта қолға алынатынын растады, деп хабарлайды Zakon.kz.
Өңірдің аграршылары министрге келтірілген орасан зор залал туралы баяндады. Олардың айтуынша, бұл тек табиғи фактор емес – жүйелі дағдарысқа айналған жағдай. Кейбір аудандарда киіктердің егін мен жайылымдарды таптауынан келген шығын жүздеген миллион теңгеге жеткен. Фермерлер инвестициядан, мал азығынан, малынан және өңірдің азық-түлік қауіпсіздігін қамтамасыз ету мүмкіндігінен айырылып отыр.
Талқылау қорытындысы бойынша министр киік санын реттеу туралы шешім қабылданғанын мәлімдеді.
"Ғылыми қорытындыларға, фермерлердің ұсыныстарына және әлемде жануарлар популяциясын реттеу тәжірибесіне сүйене отырып, киіктердің санын реттеу туралы шешім қабылданды", — деді Ерлан Нысанбаев.
Министр бұл шешім ҚР Ғылым және жоғары білім министрлігіне қарасты Зоология институты ғалымдарының биологиялық негіздемесіне, сондай-ақ Австралия, Финляндия, Канада, АҚШ және ОАР-дың жабайы жануарлар популяциясын тұрақты басқару тәжірибесіне сүйене отырып қабылданғанын атап өтті.
Экология және табиғи ресурстар министрлігі киіктердің санын Республикалық мемлекеттік қазыналық кәсіпорын "Охотзоопром" арқылы іріктеп реттейтін болады. Іріктеу халықаралық табиғатты қорғау келісімдеріне сай, ғылыми негіздеме бойынша жүргізіледі.
Зардап шеккен өңірлердің әкімдіктері Ауыл шаруашылығы және Экология министрліктерімен бірлесіп, эпизоотикалық мониторингті, қабылдау және өңдеу пункттерінің дайындығын, ветеринарлық-санитарлық және басқа да талаптарға қатаң сәйкес қосымша шараларды қамтамасыз етеді.