Орал сотының бұрынғы төрағасы Руслан Жұмағұлов алаяқтық жасағаны үшін кінәлі деп танылды. Жоғары лауазымды судьяға үкім 2025 жылғы 3 маусымда Тасқала аудандық сотында жарияланды, деп хабарлайды Zakon.kz.
Бұған дейін Жұмағұлов кінәсін мойындау туралы процессуалдық келісімге келген, сондықтан сот ісі жеделдетілген тәртіпте өтті. Онымен бірге айыпталушылар орындығында адвокат Нұржігіт Фазылғалиев те отырды.
Айыптау актісіне сәйкес, Руслан Жұмағұлов мемлекеттік жауапты қызметті атқара отырып, жеке пайда көздеп, алдау арқылы 200 мың теңгені иемденуге тырысқан.
Адвокат Фазылғалиев болса, 1,5 миллион теңгені иемденуге әрекет жасаған. Ол бұл әрекетін жеке пайда табу мақсатында істеген және оң шешім шығару үшін пара беруге итермелеуге де тырысқан. Алайда бұл қылмыстық әрекет соңына дейін жүзеге аспаған.
Белгілі болғандай, Фазылғалиевке шартты түрде мерзімінен бұрын босатуға қатысты сот отырысында сотталған адамның өкілі жүгінген. Адвокат бұл жағдайды жеке пайда көзіне айналдырып, судьяға пара беру үшін өкілден 1,5 миллион теңге сұраған. Кейін ол Жұмағұловқа жүгініп, көмектесуін өтінген. Судья келісімін берген, алайда бұл іс оның қарауында болмаған және ол шешімге ықпал ете алмаған. Ал сотталған адамның өкілі бұл туралы ҰҚК-ге хабарлаған. Кейін арнайы бақылаумен сенімді адам адвокатқа 1,3 миллион теңге берген, оның 200 мыңын Фазылғалиев Жұмағұловқа пара ретінде тапсырған.
Айта кетейік, бұған дейін ҚР Бас прокуроры екі айыпталушыға да 2 жыл 7 ай 15 күн бас бостандығынан айыру жазасын тағайындауды сұраған. Прокурор сотта процессуалдық келісімді қолдады. Айыпталушылар кінәларын мойындап, келісімге келген.
Сот үкімі бойынша, екеуі де кінәлі деп танылып, әрқайсысына 2 жыл 7 ай 15 күн бас бостандығынан айыру жазасы тағайындалды. Сонымен қатар, оларға өмір бойы мемлекеттік қызметте жұмыс істеуге тыйым салынды. Ал Фазылғалиев үш жылға адвокаттық қызметпен айналыса алмайды.
Үкім заңды күшіне енген жоқ.