Түркияда жұмыссыздық деңгейі төмендеді.

Алайда жастар арасында жұмыссыз жүргендер көп. Жоғары білімді әрбір алтыншы түлек екі қолға бір күрек таба алмай жүр. Сарапшылар мұны жастардың ауыр еңбектен қашқақтап, көбіне кеңселік қызметке ұмтылуымен байланыстырады.

Түркияда жұмыссыздық деңгейі төмендеді. Жергілікті статистика институты келтірген дерекке қарағанда, көрсеткіш өткен айда 8%-ға дейін азайды. Бұл маусым айымен салыстырғанда 0,4%-ға аз. Аймақта жалпы жұмыссыздық деңгейі кемігенімен, жастар арасында көрсеткіш әлі де жоғары. Дәл қазір менің жанымда жоғары оқу орнын бітіріп, еңбек нарығынан өз орнын таба алмай жүрген жастардың бірі тұр.

Баран Демир, Анкара қаласының тұрғыны:

- Атым Баран Демир. Амасия университетінің түлегімін. Математика пәнінің мұғалімі мамандығын бітірдім. Бірақ әзірге жұмыс таба алмай жүрмін. Мен сияқты мыңдаған түлек жұмыссыз жүр. Бұл көрсеткіш қазір 25%-дан асып кетті. Түркияда тұратын ағайын-туыс, таныстарымның ешқайсысы өз мамандығы бойынша жұмыс істемейді.

Баран білім беру мекемелеріне жұмысқа орналасу үшін сынақ тапсырған. Бірақ жеткілікті ұпай жинай алмапты. Оған қоса, бос жұмыс орны да аз. Амалсыз тіршіліктің қамы үшін басқа салада еңбек етуге мәжбүр. Дегенмен келер жылы тағы да бағымды сынап көремін, — дейді ол.

Баран Демир, Анкара қаласының тұрғыны:

- Бала кезімнен көрген-түйгенім қазір кәдеге жарап жатыр. Әкеме құрылыс саласында көмектесемін. Бірақ жүрегім мұғалімдікті қалайды. Біздің елде педагог болу үшін бәсекелестік жоғары. Сынақтан өте алмағандар 3-4 жыл қатарынан емтихан тапсырады. Өйткені жұмысқа қабылдау өте аз.

Баран сияқты екі қолға бір күрек таба алмай жүргендердің дені – 15 пен 24 жас аралығындағылар. Жергілікті статистика институты келтірген мәліметке қарағанда, бұл жастағылар арасында жұмыссыздық өткен айда 15%-ға жеткен. Әсіресе жас қыз-келіншектердің үлесі жоғары – 21,7%. Сарапшылардың айтуынша, бұған жастардың ауыр еңбектен қашқақтап, жеңіл жұмысқа ұмтылуы себеп.

Мустафа Кочак, Экономика ғылымдарының докторы:

- Жастар арасында жұмыссыздықтың артуына негізгі себеп – олардың кей жұмыстарды менсінбеуі. Ауыл шаруашылығы, егіншілік сияқты қол еңбегін қажет ететін салаға барғысы жоқ. Көбі болашағын тек кеңселік жұмыспен байланыстырады. Сол себепті еңбек нарығының сұранысы мен жастардың таңдауы сәйкес келмей отыр.

Нарықта агросектор мен өндіріс саласында жұмысшы тапшы. Дегенмен жастардың бұл салаға баруға ынтасы жоқ. Үкімет жағдайды түзетуге тырысқанымен, жастар арасындағы жұмыссыздық мәселесі Түркияда әлі де өткір күйінде қалып отыр.

Әсия Нұрлыбаева, 24KZ