Сенат мақұлдаған жаңа заң мемлекеттік қызметшілердің әлеуметтік кепілдіктерін кеңейтуді көздейді. Құжатқа сәйкес, мемлекет қызметкерлердің жалақысын кемінде үш жылда бір рет индексациялап отырады, деп жазады Egemen.kz.


Қызметкерлер басқа өңірге ауысқан жағдайда тұрғын үй төлемдері беріледі, жеңілдетілген ипотекалық бағдарламаларға қол жеткізу мүмкіндігі ұсынылады, сондай-ақ балаларын балабақшаға кезектен тыс орналастыру құқығы қарастырылған. Ал еңбек өтілі 25 жылдан асқан және марапаттары бар қызмет ардагерлеріне зейнетке шыққанда біржолғы төлем беру көзделген.

Құжаттың жеке бір бөлімі еңбек жағдайларын реттеуге арналған. Заңда 40 сағаттық жұмыс аптасы бекітілсе, I және II топтағы мүгедектігі бар азаматтар үшін ол 36 сағатқа дейін қысқартылады. Кейбір жағдайларда жұмыс берушілер толық емес жұмыс күнін белгілеуге құқылы. Сонымен қатар жаңа нормалар артық жұмыс уақыты үшін өтемақы төлеуді және еңбек өтіліне байланысты қосымша демалыс күндерін беруді ұсынады. Қызмет бабымен басқа қалаға көшкен кезде мемлекет тұрғын үй жалдау мен жеке мүлікті тасымалдау шығындарын толық өтейді.

Павлодарда мемлекеттік қызметкер желіде табыс тапқаны үшін жұмыстан қуылды

Негізгі жаңашылдықтар қатарында:

  • Мемлекеттік қызметшілерге азаматтарға формалды себептермен қызмет көрсетуден бас тартуға тыйым салынады;
  • Тәртіптік комиссиялар жазалау кезінде жеңілдететін мән-жайларды ескеретін болады, ал тәртіптік жаза мерзімі екі айдан алты айға дейін белгіленіп, оны мерзімінен бұрын алып тастау мүмкіндігі қарастырылады;
  • eQyzmet жүйесі кадрларды іріктеу процесін толық цифрландырады, ал тәлімгерлік институты жас мамандардың бейімделуін жеделдетеді;
  • Әдеп жөніндегі уәкілдердің өкілеттігі кеңейтіліп, қызметкерлердің құқықтарын қорғау және олардың шағымдарын қарау тетіктері күшейтіледі;
  • Мамандар бос лауазымдарды бір жылға дейін конкурссыз уақытша атқара алады, бұл кезең жалпы еңбек өтіліне есептеледі;
  • Заң жалақыдан алдын ала төленген қаражатты қайтару үшін ұстап қалу тәртібін реттейді, еңбек демалысынан кері шақыру ережелерін айқындайды және жұмыстан босатуға негіз болатын тәртіп бұзушылықтар тізбесін бекітеді.

Өскеменде мемлекеттік қызметкерлер қаржы жымқырған

Түзетулер бірден 18 заңнамалық актіні, соның ішінде еліміздің Еңбек кодексі мен сыбайлас жемқорлыққа қарсы іс-қимыл туралы заңды қамтиды.

Заң шығарушылар медицина саласына да ерекше назар аударған. Жауапкершілігі жоғары лауазымдар үшін есірткі қолдану фактісіне міндетті тестілеу енгізіледі, ал басшылар мұндай тексерістен жыл сайын өтіп тұрады.

Дауыс беру қорытындысы бойынша Сенат заңды Президенттің қол қоюына жолдады.